小巴黎越南餐廳 (已結業)

小巴黎我從中學開始就幫襯，由以前廿幾蚊食到而家四十幾蚊一碗檬粉，味道依然是我最愛的。今天星期六的下午，同朋友再去食檬粉，我叫左扎肉雞絲凍檬，因為轉檬粉要加$2,所以餐牌$40 扎肉雞絲河粉轉檬粉就是$42, 加餐飲$5可選凍飲或特色飲品，加$3 就是熱飲。我叫左杯椰汁綠豆冰。喜歡綠豆有嚼勁，越嚼越香，浸住椰汁，超香甜的味道，又不會甜到漏，是夏天好選擇，不過下次可以試椰汁三色冰，朋友叫左一杯好正，都有綠豆的，加埋三色冰一齊食層次更豐富。扎肉雞絲凍檬，大大碗檬粉，起碼份量和用料都足，灑上的花生碎炸蒜蓉都好多，令味道更香，食檬粉時又有香脆口感。檬粉爽口滑嘟嘟，加魚露撈埋，酸酸甜甜，佢呢d魚露是不辣的，味道不會酸到攻鼻，十分開胃的酸甜味。我喜歡食辣，加d是拉差辣椒醬調自己適合的辣度，更加惹味！雞絲其實是無咩味道，食撈檬是喜歡d粉和餸浸住魚露吸味才食，所以魚露一定要好味。扎肉，好爽口彈牙，味道就像手打魚蛋般，貪口感夠爽有嚼勁。食到碗底還有d青瓜絲和生菜絲，令整碗檬粉味道更清新，中和一下不會太濃味。總結是，小巴黎的檬粉真係保持水準，之所以喜歡食凍檬，秘密在於佢個魚露囉！