民華餐廳

營業中

休息中

雖然香港係美食天堂，中、西、日、韓、法、德、美⋯應有盡有！但作為香港人，最鍾意食嘅，都係本土嘅美食—常餐！儘管常餐嘅配搭唔係啲咩山珍海味，但係佢就係有一個魔力令到我每日都會想食。其中民華係我一個幾鍾意嘅選擇。行過見到佢都忍唔住入去食返個常餐。基本上無論係早、午、茶市，餐廳來都係坐滿人客，非常熱鬧。坐低冇耐，連餐牌都唔需要睇，其實已經可以叫嘢食！「唔該！一個常餐，要番茄叉燒通粉，配火腿炒蛋，多士走牛油，熱檸水呀唔該！」伙記唔使一分鐘，已經完成落單。呢啲真係效率！座位旁邊設有唔同嘅溫馨提示，例如炒蛋加入鮮茄湯底會更好味，一陣間一於試吓！ 2分鐘左右，嘢食就已經全部上枱。望見塊脆卜卜嘅厚多士，已經忍唔住將塊火腿夾落去一齊食！外脆內軟嘅多士，口感非常鬆軟，好味道！蕃茄叉燒通粉，湯底茄味濃郁，叉燒分量亦都算多，唔會太多肥肉，好味！嘗試將炒蛋放入蕃茄湯底伴住一齊食，咦！真係幾好食喎！甜甜酸酸嘅蕃湯底，配上超滑嘅炒蛋，簡直係perfect match!食完野之後飲番杯熱檸水，消滯之餘又健康，咁就圓滿結束啦！