餐廳用app自助落單,好方便,好過用平板落單,唔洗爭丫嘛,一個QR CODE可以同時比幾部電話落單。如果唔識用電話落單,應該可以問職員拎紙仔填,因為隔黎台對公公婆婆都係填紙仔。
刺身壽司果D都幾多選擇,雖然都係大路野,但都OK,新鮮無雪味。呢度冇好靚o既剌身盤但係碟細細夠實際,因為本身張台中間已經有個爐,再用咁大o既盤裝刺身就冇乜位擺其他野食lu

最不得了係個赤貝同海膽手卷!
赤貝刺身同出面D放題唔同,呢種赤貝刺身勁肥厚!超級爽口!忍唔住叫左40片!睇相就知,真係厚得交關,口感控o既我實在食到停唔到口

另外就係個海膽手卷,海膽都屬於貴價食品,呢度有得食之餘仲要好豪氣! 以前o係其他放題食過海膽手卷,飯就多喇,海膽就得果一片仔放o係面,但係今次食到o既手卷,d海膽竟然落到底,呢個係有少少驚喜o既。

其他野有和食,炸物,小食,天婦羅等等,基本上放題應該有o既野食都有,雖然款式唔係話勁多,又唔係特別花巧,但選擇都足夠。
天婦羅即叫即炸,上餐果陣食物都仲係燙口,呢度有天婦羅軟殼蟹,出面好似比較少見

比目魚o係出面食都係唔平,呢度有得食,燒得剛剛好

吉列蠔,大路野,唯一要投訴o係職員直接將沙律醬o即o係蠔上面,想整都整唔走...

蔥燒牛肉壽司

自助小食有墨魚咀,八爪魚,螺肉,中華沙律,木耳,青瓜等等..自己夾o既

燒烤方面燒肉選擇都頗多下,我記得上次黎,未有放題都係食呢d野,並無將價就貨,推介蒜鹽五花腩同牛仔骨,醃得好好味! 自助調料吧有好多醬可以自己拎,食燒肉配檸檬醋可以消除油膩感。




甜品選擇唔多,有d果凍奶凍蛋糕咁樣,如果有多d款式仲好。

反而雪條雪糕勁多款喎.....雪糕杯,大腳板,朱古力批,仲有melona雪條冇影到,不過太飽喇乜都冇食到


飲品款式又係多到嚇死人,三個飲品櫃入面o既野飲係冇重覆!啤酒汽水果汁茶乜都有,然後飲品機仲有果汁先生o既蜂蜜雪梨同橙汁,仲有清酒任飲...會唔會多得有d誇張,不過如果想飲熱野,就得綠茶.....

上餐速度都幾快,冇漏單,職員收碟都快,唔會食到一台都係吉碟但冇人收。日式加韓式任食的確滿到選擇困難症o既人。
另外,如果唔鍾意飲有糖飲品o既話就只能選擇綠茶同coke zero。
二百幾蚊都算抵食o既,而且將軍澳都冇乜放題食,有機會會再來!