2
2
電視效應嘅威力真係好大! 因為9月4日晚, 一個節目介紹咗呢間餅家嘅紅鴨潤月餅, 之後呢幾日都好多人慕名而來買月餅, 我就喺其中之一, 雖然住喺青衣只有年半, 之前亦有去過此餅家位於嘅市集內買過菜, 但從來都無在意呢間餅家, 直至電視節目嘅介紹! 
尋日中午時候嚟過, 老闆話一早已沽清紅鴨潤月餅, 仲話前日嚟買嘅人要大排長龍, 其實呢款餅已賣咗好多年, 只係啲人睇咗電視節目後就專程過嚟, 之前都未試過咁樣排隊, 親切嘅老闆都話要多得電台嘅免費廣告!
之後我再問下午仲有無得賣, 佢話師傅都整緊, 可能要夜晚7至8點先有, 叫我先打電話嚟問一下, 到6點幾我打去問, 但又再次沽清, 因為又有好多人排隊等買, 一出爐又即刻賣晒! 於是.我又等到今朝10點半再打去問, 店員話中午12點會有出爐, 大約11點去到, 已有幾個人排隊, 等咗15分鐘左右, 紅鴨潤月餅終於出爐喇! 原本想買兩個紅鴨潤+兩個五仁, 但店舖臨時改制唔散賣, 要以4個/盒嚟賣, 好彩排後面個女仔都係想買兩個, 咁我地可以湊夠4個, 而佢之前都買咗兩個五仁, 咁我叫店員將兩款餅各分一半裝兩個鐵盒, 店員都樂意為我們分包!
咁大個人都未食過熱辣辣嘅月餅, 今次第一次試, 仲要係未食過嘅鴨潤口味, 切開後, 聞到好香濃嘅潤腸及咸蛋黃味, 食落去咸咸香香, 而面頭嘅餅皮有少少脆, 好香口! 感覺唔油膩, 不過食得多會有點漏, 因為都偏甜, 但總括嚟講都係好味, 值得再試, 始終食得多傳統嘅蓮蓉味, 食下呢種口味都覺得好新鮮!
:
P.S. 除紅鴨潤月餅外, 其他款式嘅月餅係唔駛排隊o架!
