傷心酸辣粉 (越秀廣場)

營業中

休息中

今日特意去新蒲崗越秀廣場，就係為咗55蚊10餸飯放題而黎，屯馬線通車後喺啟德站落車穿過airside同mikiki商場就去到。呢個10餸飯放題每天都有，隔幾日就轉下菜單，55蚊可以一個鐘任食。呢個放題主打係潮式炸蠔餅，鹹蛋黃雞翼，但有時要等少少時間先至炸好，然後至有得拎，炸蠔餅蠔仔份量唔多，係幾脆口但略鹹，雞翼炸得幾脆，同鹹蛋黃好match，放題食客好多都係捕住雞翼。其他菜式方面，有炸小酥肉，潮式炸粿肉，都算有鹹香味但唔太突出。䓤油雞味道正常，菠蘿咕嚕肉肉味同酸甜味夠但炸得唔夠脆，反而蟹柳蒸水蛋出色，食落好滑溜。呢度有蒸白飯可以叫員工送上，有例湯冬瓜薏米湯天熱飲可以解暑，飲品只有泡茶同熱豆漿任飲，糖水只有紅豆沙，但有時要通知員工去再煮先至食到。55蚊10餸飯放題可以食足一個鐘，雖然食物整體唔吸引，但一分錢一分貨，呢個價錢絕對抵過茶記一餐晏晝啦。