知粥嘗樂 (已結業)

天氣凍最想食粥，但小朋友唔食粥，呢間粥店除咗有粥食，仲有唔同味道嘅炒嘢，同埋有米線，符合晒我哋一家四口嘅要求。小朋友好鍾意食呢度嘅米線，芫荽皮蛋湯味道非常濃郁，而且好香芫荽味，牛肉好嫩滑豬膶亦都好有口感。另外見到推介鴨腿湯底，同樣好好味。我同老公上網睇，個個都會叫蟹粥，於是就叫咗一鍋鮑魚蝦蟹粥，估唔到例牌嘅份量都好多，每人食到兩三碗，蟹好大隻，而且食到鮮甜味，粥底軟綿綿，配埋薑蔥豉油，蝦蟹鮑魚都可以點豉油黎食，仲有當然唔少得一啖油炸鬼一啖粥咁食，食到成個人暖粒粒非常滿足。