二八火鍋 (已結業)

試咗$228 兩小時放題，可以慢慢食冇平時限90分鐘咁趕. 多款醬料任你溝. 食物種類唔少而且質素都幾好. 另外有不少熟食小食好惹味，即叫即炸好好味. 飲品任攞，有可樂芬達等軟飲料仲有罐裝同樽裝啤酒. 另外仲有自家製飲品可以成jar 拎有驚喜，一渣渣咁攞，檸檬薑味薏米水好清潤好香，兩個人忍唔住攞兩round飲晒. 湯底有10幾款選. 叫咗鴛鴦鍋可以試晒兩種，試咗鹹豬骨同埋芫荽皮蛋湯，清清地唔怕熱氣，又可以體驗食物嘅鮮味. 食物選擇有兩頁紙都算豐富，淨係牛肉嘅選擇都好多，有安格斯肥牛、牛小排、封門柳、吊龍，比較驚喜有牛骨髓、黑白柏葉、牛脷心. 豬嘅種類都好多，黑豚肉黑毛豬甚至豬粉腸都有啊. 另外丸類餃類甚至蔬菜類都各有十幾款，啲丸大大粒爽口彈牙. 仲有個花雕雞子都幾特別㗎，鵝腸雞腸鴨血都有啊，如果鍾意食內臟嘅朋友呢度應該係天堂. 不過海鮮就唔算多. 小食有成十幾二十款，送酒一流. 鴨舌、雞腳、魚餅、墨魚餅….不能盡錄. 淨係食小食都回本啊！ 整體性價比極高，會再回頭.