銘興山西刀削麵 (厚福街) (已結業)

點咗一個豬軟骨冷刀削麵下午茶套餐，改冷刀削麵加$8，凍檸茶跟餐加$6，另外order左一罐汽水$12。打左張單係汽水加$6跟餐，凍檸茶散叫$17，足足貴咗$5唔出聲，叫佢改返，佢竟然同我講話貴嘅行先，乜野貴嘅行先😒，我點嗰個套餐凍檸檬茶跟餐唔得㗎，一定要汽水跟餐嘅咩？當我同個女侍應理論嘅時候，另一個男人走埋嚟同個女侍應講話由佢啦，改返俾我🙄乜嘢由佢啊⋯⋯呢句說話係咪應該要同我講先啱，落單嗰陣時又唔講！唔聲唔聲偷偷地收多人錢，個女侍應仲要態度差到一個點，即時將幾份餐牌好大力咁揼落張凳度。本身碗麵係唔錯嘅，俾佢搞到我咩心情都冇晒。食碗麵都要受氣。買單嗰陣個女侍仲要黑口黑面，真心覺得呢間嘢冇下次，大家都唔使去幫襯。等執笠！