小火焰韓式咖啡廳 (樂富廣場A區) (已結業)

樂富廣場最近進駐左唔少新食肆，呢間「小火焰韓式咖啡廳」就係其中一間。餐廳嘅裝修好型格，摩登時尚，加上開放式門面，感覺開揚舒適。場內置有多部電視不停地播放著 K-Pop MV，令人充滿活力。點左兩個午餐同一客小食：酥脆芝士蘑菇雞翼。午市免收加一服務費，另外每個套餐都會奉送咖啡或茶。酥脆芝士蘑菇雞翼 ($68)  雞翼炸得好香口，外皮酥脆不油，雞肉釀入了芝士同蘑菇粒，入口滑嫩鮮甜，啖啖「芝」味又充滿菇香。接著送上嘅汁燒牛肉溫泉蛋拌飯 ($58)  賣相亦很吸引，飯面鋪滿了牛肉，中間放左隻溫泉蛋並灑上了大量芝麻作裝飾，而圍邊則放了不少什菌、椰菜、紅蘿蔔和紫菜絲等，用料十足。牛肉嫩滑富肉香，米飯粒粒分明，再戳破溫泉蛋拌勻吃，蛋汁滑溜香甜，美味。另外呢客吉列豬扒蕃茄湯烏冬 ($68) 亦做得幾有水準，豬扒嘅炸漿非常薄身，咬下香脆鬆化，有嚼勁得嚟又富肉香，絕非一般貨色。蕃茄濃湯味道酸甜有致，帶蔬果嘅天然甜香，配以滑嘟嘟的烏冬，口感極佳。跟餐飲品點左蜂蜜生薑茶同即磨咖啡，兩杯飲品都熱辣辣，生薑茶薑味唔會好重，帶蜂蜜嘅清甜，飲完成身暖笠笠；隨咖啡更會附上一塊曲奇餅，誠意十足。