燒味滷師 (富榮花園) (已結業)

最近經常做無飯煮婦，日日放工都要諗買咩食，飯盒食得多食到嘴都歪，先生都開始投訴，今日決定食好少少，買佢最愛嘅燒鵝塞住佢把口。呢間燒味店非常抵食，特別係燒味飯，燒鵝雙拼都只係三十蚊，平靚正！泰式鳳爪份量好多，已經去咗骨，酸甜得嚟帶點微辣，非常開胃。下庄即係燒鵝髀，睇見賣相已經流晒口水，燒鵝肥瘦適中，一咬落去油香四溢，絕對係人間美味！店員仲好貼心，另外包好一小袋燒鵝汁，怕我倒瀉，用嚟撈飯一流！叉燒半肥瘦非常靚仔，入口鬆軟唔會乾爭爭，而且鹹淡適中，絕對係白飯殺手。鹽焗大雞非常肥美肉厚，皮肉之間仲有少少啫喱，入口嫩滑帶鹹香。呢度嘅外賣燒味整體質素唔錯，最緊要係價錢非常親民，煲個飯烚個菜又一餐，簡單方便。