金禾閣餐廳 (裝修中)

住喺呢頭，耐不耐都會幫襯金禾閣，今日食個早餐。環境其實唔錯，大大玻璃窗可以望到出面環境，有自然光，都坐得舒服。早餐都有好多選擇，呢度嘅蕃茄肉碎湯通粉喺阿女至愛。諗來諗去，揀咗沙爹牛肉麵，牛油餐包，腸仔煎蛋同熱奶茶，早餐呢個價錢($33) 要算係呢頭附近最抵食。欣賞佢有獨立包裝牛油，喜歡搽幾多都可以。可惜條腸仔凍咗，煎蛋熟晒ok啱我， 鍾意個餐包，軟綿綿，搽咗牛油好香。沙嗲牛肉麵大大碗，麵質夠爽，沙爹牛肉汁香濃，牛肉都淋。熱奶茶，茶夠濃加奶夠滑等於"香"，不錯呢！其實佢嘅選擇都算幾多，有湯拉麵、焗飯、台式肉燥及鐵板，仲有鮮魚湯飯。