大窩口荃灣交界，隔籬就係悅來酒店。雖然呢度小店林立，但係講 地道、環境、價錢、質素，呢間都算係攞到個好好嘅平衡。唔怪得知佢早午茶夜宵到車水馬龍，食客貨如輪轉。
佢出名嘅係蕃茄湯底，一定要食。清清地食個素蕃茄米線。唔錯，蕃茄味濃，酸甜度適中，啖啖蕃茄肉。米線質地都好好，QQ哋有米味。
佢另外出名嘅就係瑞士汁，識食梗係食瑞士雞翼，務求將掛到瑞士汁嘅面積攞到最大。香港獨有嘅瑞士汁，佢做得好出色，甜、鹹鮮味都好出。雞翼又唔會煮到淋pat pat。
無啦啦心血來潮，叫咗個菠蘿油。一般。
仲有要讚嘅就係佢哋嘅特色凍飲。紅豆冰 D 紅豆煲得夠淋 爆花，紅豆嘅量都好多。
