越僑

營業中

休息中

認識越僑係多年前收到佢係公司附近派嘅傳單， 公司喺中環頭平時叫外賣都係周邊熟悉嘅快餐店， 當時見到呢間新面孔真感到驚喜， 多年一直幫趁佢哋嘅茶餐為主因為款式多又好味。 之後同事發覺佢哋有網址，裡面可以搵到餐單有各樣食物分類、全日套餐、下午茶餐、party 美食，好方便而我就將網址儲存以便不時之需。近年尾忙個不停仲要OT，唔想出去買外賣於是上網摷吓有咩好食， 終於揀咗越僑因為大家都喜歡有多樣選擇。 其實店距離我公司都幾遠，搭丁丁都要三、四個站而每次外賣都準時到達整整齊齊，讚！ 蝦餅我至愛，表面炸到金黃內裡淡粉紅色蝦肉非常吸引， 肉彈牙好有蝦味，作小食不錯。 香茅豬扒紅飯係我每次午飯或晚飯必叫之一，紅飯係茄汁炒過嘅飯越南菜常見，但以配牛柳粒為主，唔食牛嘅我可以選紅飯配唔同肉類確實要like爆呀， 飯炒得粒粒都沾上茄汁但唔會過酸， 上面有一大槐香茅豬扒切成條狀整齊排列，醃得入味香口，仲有一隻煎到個邊脆但蛋黃呈流心，蛋黃汁撈埋紅飯食好味到難以形容， 唔好忘記旁邊有好惹味嘅葱油同清新嘅青瓜、蕃茄。 一見到呢個豐富飯盒即感到十分滿足。