我點嘅係L3香濃忌廉雜菌湯+吞拿魚沙律法包+蒜香雞鎚，盛惠廿八蚊，我自己另外點咗杯下午茶特價七蚊即磨咖啡。我個人覺得呢，好心就包埋杯飲品啦阿大家樂，咖啡奶茶汽水駛你幾多成本丫，一杯飲品就產生「抵」同「貴」嘅差別，點解唔做好少少呢？
蒜香雞鎚－冇蒜味，雞鎚亦冇乜醃料味道，而且炸得乾身又唔脆，可謂失敗之作。味道接近「麥記」香烤雞翼。
吞拿魚沙律法包－法包鬆脆夠熱，搽左一層蒜香；吞拿魚沙律之中有青瓜、熟蛋、紅椒，但係吞拿魚醬嘅比例太少，而整球吞拿魚沙律份量亦略為小器。
香濃忌廉雜菌湯－好「杰身」，細細碗但幾飽肚，磨菇味濃，忌廉味削；品名聲稱係「雜菌」，但係我除左磨菇之外飲唔出有其它菇菌。
一個全新套餐配以一件全新嘅餐具，本來係好有誠意嘅用心製作，但係我睇呢批餐具似乎質量麻麻，個餐推出至第二日，隻碗咁快就搞成咁？
