中環茶記 (已結業)

人在中環，真係幾難搵到啲性價比高嘅餐廳。尤其係呢一條威靈頓街，啲河粉都賣到8,9蚊甚至打住食神旗號嘅索價過百蚊，叫我地呢啲升斗打工仔情何以堪？！
終於出現左一間貼地，環境舒服，服務優質，價錢公道嘅中環茶記

話哂都座落於中環貴價地段，餐廳招牌十分搶眼，裝修懷舊得黎又夠哂有型係非一般嘅茶記！
再望望價錢，真係一啲都唔算貴，炒粉麵飯都非常齊全，唯獨係過左下午茶時段就無得叫西多士蝦多士，好可惜😢😢😢😢😢建議餐廳可以全日供應呢啲香港特色食品！！

懷舊紅豆冰

$10

紅豆冰絕對唔惹少，大大杯，紅豆數量岩岩好！甜度絕對正常，奶望落好多但其實比例岩岩好

1

香濃朱古力咖啡

$32

呢杯野犀利喇，估佢唔到咁好飲，夏天黎飲呢個真係透心涼，每一啖都有mocha味嘅碎冰，加埋啲cream真係超邪惡個賣相又整得非常有心機，推薦！

鐵板銀芽肉絲炒麵

$68

好肉絲炒麵係鐵板度上真係少食！今次係第一次！68蚊抵到爛，至比起一碗上市魚蛋粉有心機先啦係咪？
麵底邊烤到好脆，中間啲麵就有啲係軟嘅，呢一種肉絲炒麵絕對係賣飛佛！肉絲仲要冇乜肥肉，所以好罕有地我可以清哂全碟！唔會過咸，唔會落得過多生粉，無乜味精，very good

誠意之選

$138

友人就叫左碟懷舊鐵扒，有豬扒同鰻魚。估你唔到成個板入面嘅所有野都堅好食
薯條：外脆內軟，份量剛好！
雜菜：全部都係翠綠色仲要份量好多，一啲都唔hea，重點係有洋蔥
豬扒：絕對厚切，肉質結實有彈性，唔會痴牙，竟然有食西班牙黑毛豬嘅感覺！
鰻魚：係蒲燒果隻！好大條一條骨都無，好有誠意，連本人唔鐘意食鰻魚都覺得好食！
黑椒汁：唔會過咸，調較得好好！
比起大部分老牌食鐵板嘅餐廳我覺得佢真係性價比好高，重點係整得好有心機！

絕對係一間值得推薦比中環上班族嘅餐廳，希望可以keep到水準！