阿姐服務態度好好，笑容滿面，即時準備bb櫈同餐牌，見選擇有困難既我們 ， 跟手阿姐介紹以下食品。真係好細心。
嫩雞煨麵 （$58）- 真係好適合小朋友食，好香雞味，雞湯底。雞肉同菜切到細細粒， 雞肉好滑，面條索曬湯汁好林，但唔係爛。三歲人仔都食到小半碗。
小籠包（4隻）$38- 皮薄餡靚，趁熱食，咬開會爆汁，充滿左湯汁，肉汁，好好味。
鮮肉鍋貼 $40 - 皮厚左少少，但煎得好香脆，咬落去同樣好多肉汁（湯？）帶點少油，肉質鮮甜。
上海炒年糕 - 份量都幾大碟，有冬菇絲， 菜絲，肉絲， 醬汁調味唔錯。年糕唔會痴住一大舊， 每塊都彈牙煙韌。老公都話正。
紅油抄手（6隻）- 未食過好似乒乓波咁大粒既抄手 ，帶點甜味，個皮好滑。
再點左個客飯
滑蛋蝦仁，配白飯靚湯 例湯 紅蘿蔔粟米湯，賣相就一般，但好足料好好味架！
蕎麥胚芽茶 $6/位 - 好清新，健康。 食咗好多肉同醬汁，飲返啖口氣回復清新。老公話一個人都可以食個客飯。
食到勁飽都係300幾蚊, 服務態度又好，味道又好，下次要試埋糖醋魚或樟茶鴨。好期待
