生記食家

營業中

休息中

黃竹坑，喺我眼中已經係一個美食沙漠。除咗之前介紹過嘅一間樓上外賣飯盒舖頭之外，真係冇乜邊間係可以用正常價錢食得到一個午餐。嚴格嚟講唔係冇美食，雖然我未食過，但係睇食評同人流，質素應該唔會太差，只係太貴，對於低級員工嚟講，八九十蚊食一個午餐實在太奢侈，所以我係唔會去食。所以今次就去返平民化少少嘅南朗山道熟食中心，上次試過兩間，質素都比較差。今次就試一間比較多人推薦嘅「生記」，試試佢個招牌椒鹽肉排飯。落單唔夠一分鐘，飯已經上枱，心知不妙。點解咁講？因為上菜速度咁快，即係肉排唔係即叫即炒，而係一早整定。果然不出我所料，飯係熱，肉排係暖暖地，肉質唔太韌但係冇肉汁，皮唔夠炸脆，椒鹽味唔重，好彩嘅係啲豉油可以撈到飯食。雖則味道真係好一般，但係價錢就真係抵，如果堂食唔要飲品就$35，另外佢有午市套餐都係$39，性價比嚟講真係贏盡其他區內我試過嘅餐廳。不過，眼見隔離枱嗌嘅乾炒牛河，色水又幾靚，下次都係試返一啲有得即叫即炒嘅食物。