嘉寶漢堡 (和益中心)

營業中

休息中

經過寶勒巷見到嘉寶原來有間咁大嘅分店，入到去環境乾淨寬闊，仲有洗手機。套餐可以揀一款指定小食同飲品，飲品選擇幾多，連茶類都有。大啡菇芝士牛堡牛肉味濃，而大啡菇充滿水份，麵包鬆軟，加埋醬汁同配菜一齊食層次豐富。孜然香辣羊堡另加菠蘿，羊味唔會太羶，烤過嘅菠蘿好有驚喜，新鮮香甜juicy，估唔到幾夾，越食越開胃。指定小食叫咗薯餅同番薯條，兩樣都好香脆，番薯條粗身，帶有番薯甜味，唔使點任何醬汁都好好食。另外加錢要多個香脆粟米片雞塊，有好多醬汁可以揀，我就最鍾意燒烤同蜜糖芥末醬。第一次咁食雞塊，外皮加上粟米片真係份外香脆，口感豐富，下次都要再叫！