老虎冰室

營業中

休息中

今日放工近近地喺屋企附近vcity同老婆食個晚餐，埋餐200幾蚊，但個人認為呢間餐廳嘅質素大約只有快餐店水準，唔值呢個價錢。老婆叫咗佢哋嘅老虎雜扒餐，係鐵板扒餐。首先粟米湯（餐湯）已經令人失去食欲，賣相就似水溝一堆生粉，飲落都係好杰。鐵板亦都唔夠熱，醬汁淋落去了無動靜，完全冇食鐵板餐應有「咋」一聲嘅效果。而黑椒汁除咗好油之外都冇黑椒味，豬扒overcooked，肉質好韌好嚡，跟餐嘅配菜焗薯亦都唔夠熱。而我就叫咗XO醬虎蝦雞煲，同鐵板一樣個煲唔夠熱。然後本身見餐牌上有辣椒就以為啲雞係辣辣哋，但一試就發覺連我呢個平時唔太食得辣嘅人都覺得唔辣，十分失望。但虎蝦質素就還可以，啲肉唔會霉霉爛爛。整體而言唯一值得稱讚就係份量夠多，但下次唔會再光顧。