加藤屋 (黃禮賢大廈) (已結業)

疫情後真係好耐無出旺角，星期六到旺角做完嘢，行咗陣花園街，唔經唔覺已經近兩點，所以決定醫埋肚先返歸。近花墟嗰段嘅花園街有好多細細間嘅食店，唔同類型嘅菜式都有。友人話想試下呢間加藤屋，我見都有嘢啱食，所以就試下喇！油尖旺果然係年輕人嘅地盆。。。餐廳大部份客人都係十幾廿歲嘅後生仔女，頓時感覺年輕晒。入座時已經夠兩點，可以叫下午茶餐。下午茶餐都有成廿個選擇，雖然都係豬/牛/雞配飯/烏冬/米粉，但都令人目不暇給。我叫咗野菜雞扒烏冬，朋友就叫咗加藤牛肉飯，下午茶餐包汽水/麵豉湯/玄米茶，或加錢配其他凍熱飲品。下午茶餐嘅牛肉飯同雞扒烏冬份量係少啲，賣$30仲有飲品我絕對收貨。雞扒細細一塊，味道不俗，湯底都可以，唔太咸。牛肉飯就同連鎖牛肉飯店食倒嘅味道差不多，所以味道都係唔錯嘅。