珍記大廚小食

營業中

休息中

石硤尾係我由細到大長大嘅地方，平時放假收工都會去白田購物中心買野食，最近見到開左間新既小食店，樣貌款款都好吸引，所以今日襯放假，去幫襯下！ 去嘅時候咁啱撞到小店嘅老闆，喺迷惘之際唔知食乜嘅時候，佢就推介左幾款比較招牌受歡迎嘅小食。《煎釀三寶》$10/6件應該係全個石硤尾最平，好抵食！有青椒、茄子、紅腸、豆腐同蟹柳👍🏻👍🏻《茶葉蛋》$4好入味！食過好多都係食到個黃就無咩味，呢個好掂👍🏻《炒米粉》$14呢個炒米粉乾濕度岩岩好，而且蔬菜又夠多，份量都唔少。《蔥油雞扒》店內既招牌，蔥油係店主自家制，用手剁出黎，並非用機器，所以會香啲，食落又真係好香，雞扒配上蔥油口感更嫩滑，而且炸完外皮脆脆地，好好味！《炸雞髀》$18大大隻炸髀，外皮好脆，唔知道係咪炸得太耐所以肉質有啲乾。呢度嘅辣醬都係自家製，有兩款其中一款係麻辣，辣度偏大眾化，辣味唔會停留好耐，所以大部份人應該都能接受，重點係味道真係比普通辣醬更香，加入炒米粉燒賣之中真係一流，小店仲有好多特色小食日後要再試。