十三少 (已結業)

喺 #酸菜魚關注組 見到有人講香港仔都有酸菜魚，咁近無理由唔叫屋企人一齊去試下。其實一直唔知呢間舖個真實位置，到現場先發現原來喺小巷入面。以為酸菜魚好老套？呢度裝潢就夠哂光猛，牆上有圖畫介紹返招牌菜，仲有由本地漫畫家畫嘅老闆嘜頭，即刻後生哂。夜晚見到有個二人餐 $318，有涼菜、酸菜魚同小菜，決定叫呢個唔駛煩。椒麻皮蛋有流心效果嘅皮蛋，店員介紹係來自四川嘅皮蛋，加埋秘製醬汁、鮮椒碎同吃，麻香兼備。酸菜魚無諗過上檯勁大碟，除咗鱸魚片、酸菜、菇菌、萵筍等等，魚片嫩滑又大塊，份量又多，唔會食幾塊就食哂。湯底以鱸魚骨熬製，加埋兩款酸菜，令湯底味道更有層次，加埋唔同食材令人一次嘗到鮮香酸辣。麻婆豆腐選用四川正宗方法炮製，豆腐切成大小差唔多，加上肉碎、醬汁、蔥等等、超好送飯！上網睇返原來大角咀都有分店，九龍區朋友可以去果間。