馬祖 (將軍澳廣場) (已結業)

養生火鍋放題任食同朋友喺將軍澳行完街，天氣涼涼地啱哂打邊爐，記得之前上網睇過有間全港首創藥膳養生火鍋放題，時間仲要係120分鐘，相比坊間普遍嘅台式/日式火鍋多半個鐘，見餐廳評價都唔錯，啱哂我哋傾計慢慢食。揀咗$298美國prime grade 極尚牛頸脊及西班牙伊比利亞黑毛豬放題套餐，餐廳顧名思義主打藥膳湯底，我叫咗藥膳花雕清雞湯，朋友叫咗藥膳台灣沙茶湯，果然名不虛傳，湯底好重花雕味/沙茶味，湯底配上牛/豬唔洗點醬料都好入味。牛頸脊重牛味，肉質鮮嫩，肥瘦啱啱好，食落口唔韌。黑毛豬夠驚喜，入口即融，值得不斷encore。喺外面自助區嘅配料豐富，丸類都已經有10幾款，而最特別有芫荽燒賣&黑椒台灣腸。飲品區有多款凍飲，連暖飲都有，啱唔同人嘅需要，夠貼心。甜品區有多款雪條、雪糕，連貴價嘅movenpick 都有，仲要有4款口味揀，食多啲雪糕都抵返哂。