添好運點心專門店 (已結業)

之前成日經過旺角總店，每次都好想試下佢出名o既脆皮叉燒包，但係每次都比條人龍嚇走。星期六咁o岩12點經過北角，知道附近有佢o既分店，即刻openrice搵佢o既位置，諗住去碰下運氣，點之無人排隊(可能個場頗大，人流快)，就入去試下。點心種類都有約30多款，價錢好合理。 本來好想試佢o既盅頭牛肉飯(隔離食緊覺得好靚，只係廿幾蚊)，但係得兩個人，想試多幾款點心，實在容不下佢。 點左5樣點心，除左鹹水角餡料太重豬油味，樣樣都有水準，連茶位都係93蚊，都係超值，下次帶埋大食仔仔去，可以食多幾樣就開心好多喇。