泰出色泰國餐廳

營業中

休息中

約咗朋友嚟天后食晚飯，朋友想食泰國菜，帶咗我嚟電氣道呢間「泰出色泰國餐廳」。聽朋友講，餐廳主打正宗泰菜，喺區內開業超過10年，一直深受街坊歡迎，而且咁多年都依然屹立不倒，實力可見一斑。我哋點咗👇碳燒豬頸肉，豬頸肉燒得好香口，肉質爽彈又軟滑，外脆內Juicy，點埋個秘製泰式辣汁食，超惹味。平時去食泰菜，最鍾意就係點泰式明爐蒸烏頭，今次搞搞新意思，試下燒原條烏頭魚。烏頭即叫即燒，外層用鹽包住，入面塞滿泰式香料。掀開魚皮，魚肉鮮甜嫩滑，點少少泰式辣醬食，香辣醒胃。泰出色海南雞飯轉髀，海南雞皮薄肉滑，入口雞味好濃郁，加上已經全部去晒骨，食得好方便。油飯水準亦唔錯，粒粒油潤，乾爽又帶香味。泰式蝦球炒雜菜，雜菜好足料，有西蘭花、粟米仔、紅蘿蔔、芥蘭同椰菜等。蝦球肉厚爽彈，有6大隻，配埋啲雜菜食，有營又健康。 臨尾仲嗌咗椰青糕同椰汁西米糕，椰青糕味道清甜、口感爽脆；西米糕柔軟細緻、甜度剛好。