樓下冰室

營業中

休息中

諗唔到食咩好，好多時都會去冰室，貪佢夠多元化，坐低一定揀到自己想食嘅嘢。今日嚟到鰂魚涌嘅樓下冰室，終於可以試下傳說中嘅番茄濃湯通粉同招牌瑞士雞脾。套餐可以半價加飲品，見到餐牌有個好吸引嘅華田脆脆同充滿童年回憶嘅紅豆冰，一於試下先。 🍅🍅特色番茄濃湯通粉配牛乳炒蛋（＄57）- 番茄湯底十分濃郁，味道酸酸甜甜，但無過酸。蛋炒得好滑，另加$8要咗豬膶，豬膶好爽滑，入口唔會太韌。🐔🐔招牌瑞士雞脾，一定要讚下個瑞士汁，整得好入味，聽講係用頭抽秘制，真心好正。雞肉肉質好嫩滑，不愧為招牌菜式，必食推介!👍🏼👍🏼🍳🍳另一個皇牌，樓下三寶飯（$60），包括自家製叉燒、瑞士雞翼同埋煎蛋。叉燒相當有驚喜，勁入味同埋好淋。瑞士雞翼就唔使講，個瑞士汁極度出色。煎蛋做到流心效果，撈埋飯一齊食，味道好好。 🧋🧋華田脆脆（套餐半價後$13）- 好濃郁嘅華田，仲有好多脆脆響面，有得飲之餘又有得食，好有層次同口感。 🇭🇰🇭🇰環境好有港式情懷，食物多元化之餘味道亦都好好。入到去一定有野啱食，呢啲就係冰室嘅可愛之處。