廚匯濃湯雞

營業中

休息中

行過旺角搵食，想食啲暖胃嘢，見到呢間鋪頭幾旺場就試吓。今次叫咗兩鍋一小食，胡椒豬肚雞鍋配薯粉($64) 同 濃湯魚三寶鍋配米線($62)，再加份 懷舊蝦多士($22)，埋單$148有找，抵食到笑！先講個蝦多士，一咬「咔嚓」聲脆到耳仔醒神，麵包炸得金黃唔油膩，中間蝦膠彈牙仲有新鮮原隻蝦肉，廿二蚊有咁高質真心驚喜。跟住重頭戲胡椒豬肚雞鍋，湯底滾住上枱，白胡椒香攻鼻但唔嗆喉，飲落成個胃即刻暖笠笠！豬肚份量夠晒多，洗得乾淨冇異味，啲雞件仲要嫩滑過蒸水蛋，薯粉索哂濃湯精華，嗦嗦聲吸到停唔到手～朋友個魚三寶鍋都唔輸蝕，魚腐、魚片頭、魚蛋鋪到滿一滿，浸喺奶白色魚湯裏面滾到脹卜卜。魚腐吸湯能力滿分，咬落爆汁魚味濃，米線份量多到朋友食到捧住肚，仲話啲娃娃菜索咗魚湯甜到似食緊海鮮！最抵讚係價錢貼地，兩個鍋都係六十零蚊但料多湯靚，冷天食完由頭暖到落腳趾尾。記住留單五日內再嚟有$5優惠或者送飲品（下午茶時段除外），呢個質素絕對會返兜！