蒲羅

營業中

休息中

樂富其實其實都幾好行，又好多嘢食，價錢又合理。今次見到呢間馬拉嘢鋪面好靚，裝修好新，環境又坐得舒服。呢間浦羅主打馬來西亞新加坡嘢食，見到個餐牌就勾起以前去馬拉新加坡美食之旅。宜家仲未通關，唯有本地馬拉嘢餐牌上好多選擇，每一樣都好吸引，好想食晒佢。最後千挑萬選後，揀左椰絲蝦球，海南雞飯拼迷你叻沙，老鼠粉。海南雞飯拼叻沙，可以一次過滿足2個願望，雞肉好滑好嫩，雞油飯好香，叻沙比想像中辣，但好濃椰香味，米線好Q, 好好味。椰絲蝦球有好多隻，都算抵食。椰絲好香，蝦肉好彈牙，食到Lam Lam脷。椰絲好似無麥皮蝦咁熱氣，不過下次一定試埋麥片蝦。老鼠粉原煲上，熱辣辣，好有煲仔飯feel,一開蓋就要即刻撈，唔係d粉會痴晒底。老鼠粉熱辣辣，配埋香口惹味嘅配料一齊食，好好味，好似置身馬來西亞一樣。