光榮冰室 (厚福街) (已結業)

尖沙咀厚福街，最近呢幾年開咗好多唔同類型嘅食肆，最近呢一個月出現咗一間幾懷舊嘅冰室，裏面嘅裝修好似返返去80年代一樣。用咗兩白色嘅燈，加上冰室專用嘅卡位。冰室嘅奶茶從來都係主角，呢一杯奶茶值95分！巨型叉燒奄烈都算澎湃，不過蛋炒得有點老。反而叉燒有幾驚喜，半肥瘦唔會太韌。除咗一般嘅冰室食物之外，晚上仲有煲仔飯。價錢唔算特別平，始終係尖沙咀呀嘛。不過趁住呢一個咁涼嘅天氣，有乜嘢適合得過同朋友一齊一人一煲？諗起以前，唔知頭唔知路，竟然人排我又排，去咗油麻地一間「好出名」嘅煲仔飯「名店」點知食完真係好失望，可能因為已經出咗名，所以食物誠意欠奉。煲仔飯根本唔係嗰種感覺，好似只係用過瓦煲乘着嘅臘味飯一樣。反而，呢一間新開嘅冰室就冇令人失望。臘味煲仔飯，臘腸潤腸切半，加上油香十足嘅臘肉。點上煲仔飯嘅靈魂，甜豉油。瓦煲令到飯香十足，而且好乾身！食到底更加有飯焦，呢一個絕對係食煲仔飯嘅樂趣。窩蛋牛肉飯，牛肉係用上新鮮牛肉，食落去好香肉味。而且牛肉嘅份量絕對唔欺場，加上窩蛋，每一粒飯都沾滿了蛋汁。最後加多$20就有一碟油菜。除咗生菜，仲有菜心以及芥蘭選擇。七點幾嚟到，愈夜越多人，呢一間小店真係唔可以睇小