麻辣派對 (金百利廣場) (已結業)

今日去到銅鑼灣嘅金百利廣場，難得人少少就上去搵嘢食，最後揀咗呢間裝修非常之少女心，成個場地擺滿曬花花嘅川菜，好強嘅反差萌。擔心太辣，所以一嚟即刻叫杯水果茶，比想像中大杯好多，而且好多生果，飲落去清清哋，唔會太甜。朋友驚熱氣叫咗罐加多寶。健康啲叫咗蒜香牛油野菌雜菜，一放低嘅時候已經聞到好香牛油味，雜菜有秋葵、椰菜、萵筍等等，食落仲好香蒜味。我哋仲嗌咗個紅油火雞腎做配菜，非常之惹味，除咗雞腎，仲有花生同青瓜絲，餐廳亦都加咗花生醬，撈埋食一流，仲有啲似擔擔麵。嚟到主菜水煮魚，食客可以選擇用咩魚，我哋就揀咗比較少見黑魚，肉質比平日水煮魚食到嘅魚結實，但比較多骨，食嘅時候要小心。鍋入面仲有蒟蒻、芽菜同河，兩個人絕對夠食，我仲加咗炸豆腐角，入哂湯味非常好味。朋友仔叫咗碗白飯送水煮魚，都好惹味。埋單計數，如果唔係口痕叫咗好多小菜應該300有找。