雞翼山 (T.O.P This is Our Place)

營業中

休息中

一直都好想試雞翼山，不過每次都搵唔到人陪我食，今日終於搵到2個partner。呢度主要係做外賣，不過都有少量位置可以堂食。一直都知道雞翼山有好多唔同口味嘅雞翼可供選擇，原來佢仲有套餐供應。我同朋友就買咗兩份餐開心share。不要儀態一人餐總共有三款，我哋就揀咗B餐嘅溫泉蛋洋蔥雞翼丼、甜芥辣雞軟骨、唐揚蝦。呢款係配以慢煮嘅雞翼，所以肉質特別嫩滑，雞軟骨同唐揚蝦同樣香口，溫泉蛋同洋蔥撈飯真係冇得彈。另外當然要食返個雞翼餐，我哋揀咗三款口味各四隻，其實可以揀雞鎚，不過我哋就鍾意食雞翼多啲。韓風吉士鹹蛋醬雞翼嘅精髓就係吉士鹹蛋醬，炸香嘅雞翼搽上凍凍嘅吉士鹹蛋醬，味道又出奇地夾。濃口櫻花蝦蝦醬雞翼充滿蝦醬嘅鹹香，上面再灑上櫻花蝦，又係一個惹味嘅口味。文青風玫瑰雞翼就最驚喜，玫瑰糖漿包住整隻雞翼，鹹鹹甜甜嘅味道就好似BBQ嘅燒雞翼咁好食。雞翼山果然係將雞翼整得出神入化，下次要試多幾款口味。