阿叔泰麵 (西菁街) (已結業)

過開嚟元朗，去咗朋友介紹嘅阿叔泰麵。本來以為泰式炒菜類嗰啲泰國菜，原來係麵線類，層層疊嗰啲。6點天一黑就到，所以就無乜人。餐廳掛滿泰國嘅紙遮，同度牆畫咗啲泰式畫。小店感覺好泰風。首先叫咗個牛肉船麵、香茅魚露雞翼同糯米飯。我地叫嘅牛肉船麵係河粉，係泰式大大片嗰種河粉。同埋個湯底濃得嚟唔咸，好明白其他人話好正宗嘅泰風味。牛腩好有牛味又唔韌，牛丸細細粒爽口彈牙。不得不提佢嘅豬皮係脆卜卜架 ！唯一份量唔算多，所以食咗一半我地都加多碗冬陰功金邊粉。雞翼隔咗陣就到，佢似乎即叫即整，上菜時熱辣辣！我喜歡佢香茅味剛剛好，平時食嘅香茅成日都整到好重味。魚露味都少少。後加嘅冬陰公金邊粉就不過不失。金邊粉份量就多好多，不過啲配料唔係好新鮮嘅，唔算突出。湯底略嫌唔夠酸。我地仲叫咗杯玫瑰花奶茶，好重香料味，喜歡泰式奶茶嘅一定要試。最後係芒果糯米飯，佢啲糯米飯似乎係即叫即蒸，等咗一陣先送上，啲飯仲係好熱。不過似乎泰國啲芒果送唔到黎，啲芒果好酸。整體係唔錯嘅，我會再嚟，試下佢啲飯。