加記 (真善美大廈) (已結業)

第一次晌到寫食評，就係比左加記。星期一晚同老友去加記晚飯，價期前夕無book檯，要等半小時檯，因為我第一次幫襯，所以交比朋友發板，人少叫唔到多野食，只係叫左之前朋友試過既米酒雞同埋大蝦伊麵，每碟約80~90蚊，以呢個份量黎計真係超值，因為而家好多新派中菜酒樓可以把呢個份量分到做兩碟，先試了大蝦伊麵，係比較油，但係我覺得可以接受，當咬落個蝦球既外皮，果種脆口同埋裡面非常彈口既蝦肉，美味既程度簡直令我不自覺要合埋眼去品嘗，唔好怪我講得誇張，因為我真係比足100分。聽朋友話上次佢食果陣有落芝士仲更加好味，男部長話之前加芝士，比客人投訴芝士有怪味，所以現在唔再落芝士，呢個解釋都幾奇怪…之後食好大盤既米酒雞，原來有糯米飯晌d雞下面，我諗可以足足分到十個碗，果刻我開始驚我同老友兩個大男人會食唔晒，雞好滑，鋪滿晒晌飯上面，好多紅棗同北菇，糯米加上少少酒味同雞味實在一絕，搞到就咁食糯米都已經覺得好好味，不過比伊麵更加油…呢一味我都比80分以上，我地本身已經飽成咁，都仲覺得好味到要食晒佢為止…飯後果係雪凍左既荔枝。飲埋兩支啤酒，每人百二蚊，以呢個味道同份量，非常滿意，已經約緊多d朋友再去試佢其它菜式。