二兄車麵館 (已結業)

路過見到張海報寫住最新出品，影出嚟都好吸引，係冬菇花膠炆幫我鵝掌嘅米線，寫住係濃湯添，我心諗呢個組合都唔會差得去邊。一於搵日要去試吓。入到去就二話不說，馬上落單，喺等緊嘅過程中見等得咁耐，都超過10分鐘，我心諗嗰啲嘢唔係一早炆好晒嘅咩？結果反正有時間，就上OpenRice睇吓啲評語。點知一睇，清一色負評，惡劣到我以為佢俾人惡搞，越睇越驚，心諗可唔可以取消呢？可惜為時已晚，唯有忍耐住等碗米線上桌。米線終於千呼萬喚始出來，一口咬落冬菇嗰度，又林又香，都幾入味，心諗好在冇中伏，安樂左一半。跟住試吓花膠，好似完全係由頭到尾用清水煮出嚟咁樣，零味道。再食下啲米線，完全冇味，試真下個湯底，其實只係得好少嘅鹹味，個味道絕對唔夠供給米線，所以個米線係完全冇味。再加上呢個鹹味，令我懷疑其實只落咗鹽，好難受！我完全唔明白，係咪冇味覺，點解可以整得出呢個咁嘅湯底！真係好驚嚇，我敢講，有生以來從來未食過淡到咁嘅湯底，感到心痛，覺得佢哋根本糟蹋左食物同埋食材。一心以為點碗米線可以幫佢哋洗底，點知好難受，猶有餘悸，之後嗰幾日經過，都有啲心驚。