佳佳甜品

營業中

休息中

上一份工成日要去永安百貨，同事就介紹嚟佳佳。傳統糖水無咩巧妙，最重要係用心煲，無渣漏攤就得，無奈香港好多糖水舖都係是是旦旦，自己平時都少食咗。咁岩呢日同兩位朋友去佐敦附近，又嚟一次佳佳，九點鐘都係要排隊，但好快就入座。原意叫核桃露加湯圓，可惜賣完，唯有轉芝麻糊。芝麻糊滑而不過甜，濃濃芝麻香，無花巧，就係水平之上。湯圓都係芝麻餡，外皮煮得剛剛好，唔會未煮透痴牙，又唔會煮過火太爛。同行朋友叫咗蛋花馬蹄露同粒粒紅豆涼粉，馬蹄露我就無試，紅豆涼粉嘅紅豆唔係紅豆沙個隻，有咬口，連涼粉同吃又有一番特別口感，算係傳統中有新意。服務算係還好，落單細心，會再三確認以免送錯。雖然無趕人走，但整體嘅氣氛都唔係容得下人久坐，同其他糖水舖一樣。呢樣就睇嚟係成個香港既問題了。