澳門翠苑餐廳

營業中

休息中

之前見朋友面書上post左幾張農夫包相好吸引，上開飯網一搵，原來係旺角鬧市中，咁就趁今日收早黎試下啦。餐廳位於朗豪坊對面既旺角熟食中心，相當易搵，雖則環境一般，但勝在地方夠大，好易搵到位。黎得呢度梗係要食咖喱農夫包，有牛有豬有雞同魚任你揀，農夫包餐仲包鮮茄牛腩湯同飲品。落完柯打後，店員就會俾個牌你，之後就會有專人送餐俾你，非常方便。今日食咖喱牛腩農夫包，由於係即叫即焗，所以個包非常燙手。牛腩炆得非常淋同入味，農夫包外脆內軟，餐廳仲提供埋手套，方便俾你慢慢撕開麵包食，每舊麵包點埋咖喱汁，話咁快就食晒。跟餐既鮮茄牛腩湯亦好味，蕃茄味濃，配料亦足夠。總括黎講，呢度既咖喱農夫包真係好好味，雖則個餐只有一個農夫包再加餸，睇落唔係好多，但食完都非常飽。