豚王 (V Point) (已結業)

星期五放工同朋友喺灣仔消防局附近做完按摩，落住雨，八點幾，想喺附近簡簡單單食個晚餐，諗起登龍街好多好食餐廳，就決定行過去搵間啱心水嘅坐低。呢條街有好多美食，當中包括唔少日式拉麵店。行咗一陣，我哋揀咗豚王。舖頭用日式嘅裝修，雖然係坐長枱，但係都坐得好舒服，位置亦好闊落，每個人都有好多空間。日式拉麵店食物選擇比較簡單，呢間拉麵就有豚王，黑王，翠王同赤王可以揀，分別主要係湯底，我今次就揀咗黑王，係墨魚汁麵，再加多蒜蓉，麵硬度就揀咗適中。拉麵好快嚟到，第一次食墨魚汁拉麵，好香，好濃郁，份量適中，揀咗豬肩肉，唔會太肥，好好咬口。黑王既蒜雖然係黑色，但好好味，真係連湯帶渣都食曬，正！另外，店員非常友善有禮，上餐速度亦好快，推薦！