燒肉801

營業中

休息中

上次同朋友食完覺得好味又抵食，今次專登帶老婆去食。食物質素保持到上次嘅水準，肉夠新鮮，份量又足夠，食慣好西嘅老婆都讚不絕口。今次叫咗801 盛double & 上次無試到嘅海鮮盛single，除咗牛肉同雞肉都夠嫩滑，喜出望外嘅係個海鮮盛都好好味！平時出街唔鍾意剝蝦殼嘅我都要encore 一客海蝦，因為真係好鮮味！原本諗住食完去食糖水，但驚糖水舖排長龍，於是求其叫咗個杏仁豆腐，點知個杏仁豆腐都出奇地好味，夠滑又香杏仁味，甜度又適中，估唔到喺燒肉店都食到有水準嘅甜品。最後埋單total六百左右，喺尖沙咀嚟講算係性價比高之選。