皇室冰廳 (已結業)

今晚去開長沙灣附近，見到呢間皇室冰廳就入去試下，本身諗住應該係一般茶餐廳嘅質素，點知食落發現有驚喜真。番茄濃湯特餐，餐牌寫住鎮店特餐咁厲害，所以一定要試一試佢，跟餐嘅無味精老火例湯，好足料：有椰子、紅蘿蔔、瘦肉，飲落有好濃郁嘅鮮味，應該煲咗好耐，正！個番茄濃湯烏冬因為係用新鮮蕃茄每日新鮮製造，味道果然好濃郁，烏冬亦都彈牙牛乳炒滑蛋亦都好香蛋味，而最值得介紹嘅絕對係佢嗰塊即叫即炸嘅吉列豬扒。外皮薄薄嘅一層粉漿香脆鬆化，包裹住入面非常鬆化嘅厚切豬扒，我仲食得出豬扒好似有好香嘅豉油味，真係會食上癮！醬爆茄子脆魚柳煲，非常夠鑊氣，一拎上檯已經聞到香味。整個煲味道濃郁，茄子腍滑，魚柳亦十分鮮嫩入味，同埋魚柳分量好多，配埋白飯一齊食簡直一絕！椰汁涼粉冰，淡淡嘅椰香加上涼粉，解渴得嚟又好味估唔到咁平民化嘅價錢都可以食到咁好味嘅食物，絕對物超所值，一定會返嚟試埋其他餐！