裝修之後既 Aeon 的確令人耳目一新，除左比人感覺更加高檔，行得又更加舒服。
行得太古當然會行埋格離康怡廣場，呢面既鋪頭同之前嚟好似都有d改變。
其中一間之前嚟好似都唔多覺有係度既餐廳，一於試下。
呢個集團既分店都有食過，而且近幾年都見到佢積極擴充，感覺好似更多元化。
雖然今晚係嚟食晚餐，但門外見到原來早餐都有做。可惜我唔係住呢頭，我亦唔會神咁早去呢度，應該無咁機會試。
入面都幾大，環境寬敞，仲有個open kitchen，比人既感覺舒服。
晚餐全部set menu，今期應該做緊龍蝦餐推廣，$498買一送一。
不過我一條友，要食兩份有難度。
1
時令生蠔半打 (1/2doz) $98
跟餐可以用$98食半打生蠔，岩晒我胃口。生蠔係薄身款，味道都幾鮮甜。
套餐先食餐包
香煎鵝肝、黑椒菠蘿、蘋果漬 (+$45)
前菜加左$45轉鵝肝，煎得唔錯，入口即溶。下面黑椒菠蘿幾甜，連埋鵝肝一齊食，緩和左鵝肝"溜"既感覺。
磯煮鮑魚帶子燴野菌意大利飯 $160
鮑魚加落意大利飯呢個組合都幾新鮮，所以就吸引左我揀嚟食。磯煮鮑鮮味爽口，帶子稍稍煎過，啖啖肉又香口。意大利飯比起一般食開飯質略軟，味道唔會好濃。
朱古力曲奇芝士餅
賣相討好，芝士餅夠鬆軟，略嫌芝味不夠突出。
咖啡
甜品芝士餅配番咖啡岩晒。
食飽繼續係太古行街，呢度咁大真係有排行！
