陶館

營業中

休息中

喺中環返工，周圍d野都咁貴，尋找抵食嘅餐廳食lunch係好重要嘅。今日黎左呢間陶館，之前都嚟過幾次。一如既往，非常多人排隊，座位又比較少今次兩個人大約等咗15分鐘 ， 建議趕時間嘅人可以買返公司食。叫咗份鰻魚珍珠飯， 鰻魚鮮味多汁，餃子亦煎得好香，仲有大大份配菜，份量真係唔講得笑。我算係比較大食嘅 ，但兩大條鰻魚加三隻餃子，飯嘅份量又超過一碗，都食剩少少飯。 至於我嗰個細食嘅同事叫嘅黑椒牛扒飯，佢分咗半塊扒畀我都仍然食唔曬。 餐飲可以選擇各種各樣珍珠奶茶，通常餐廳都當係特飲，但呢度午餐可以免費加熱飲，凍飲加三蚊。 我叫咗杯最普通嘅凍珍珠奶茶，不過不失啦。下次會試下特別啲嘅班蘭奶茶或者薰衣草奶茶。食到咁飽都只係76蚊，中環來講算係良心價，會keep住幫襯。