潤一潤甜品屋

營業中

休息中

喺附近食完 lunch，同朋友搵個地方繼續吹下水。去到潤一潤嗰陣啱啱開鋪無幾耐，得老闆娘一個，所以有好幾個想嗌嘅甜品都未準備好，老闆娘好好態度甘解釋翻，亦無因為一開鋪手忙腳亂就 hea你或者粗聲粗氣甘答你，令人覺得坐落都舒服好多。我最後嗌咗牛奶紅豆丸子刨冰，朋友就嗌咗芒果小丸子。刨冰大份到成座塔甘，不過冰粒感好重，口感普通之餘亦帶黎另一個問題，就係無辦法由上面開始食起，而係只能夠慢慢用勺挫個刨冰搭嘅底部甘食，於是個搭就越黎越搖搖欲墜，於此同時個碗亦裝得好滿，食嗰陣都有D驚佢冧低令碗入面嘅紅豆丸子瀉出黎。牛奶其實即係煉奶，配搭起黎味道其實係 OK嘅，不過原本嗌嗰陣以為真係牛奶，所以第一下入口嗰陣就有少少失望。呢個價錢就唔好預紅豆會大粒飽滿，但值得一讚嘅係丸子嘅份量都頗足。亦試咗朋友嗌嘅芒果小丸子，同樣地丸子份量足夠，不過唔算煙韌，芒果粒大大粒且甜度適中，微酸，個底唔會甜到漏，應該無另外加或者只係加咗少少糖水落去。總括而言，廿幾蚊嘅價錢可以有個地方慢慢坐下又食到份量足嘅甜品，都算幾抵，就價格而言，味道亦合理。埋單嗰陣老闆娘好親切，令人感受到頗難得嘅人情味。