和順記 (碧街)

營業中

休息中

突然間好想食炸雞髀，特登揸車出去和順記買，差唔多到就用OpenRice app 點外賣自取，其實真係幾方便。叫咗兩份下午茶餐，兩份都係大雞髀，一隻炸，一隻豉油。炸髀除咗炸得香脆，食得出佢嘅肉係有經過精心嘅醃整，入味之餘，味道比較豐富，唔係普普通通鹽同胡椒粉。我睇過啲YouTube教人炸雞髀，話傳統嘅港式茶餐廳炸雞髀，係要用紅蘿蔔，洋蔥西芹之類嘅蔬菜去醃製，增添佢嘅味道，估計和順記應該都係呢一類，唔知有冇用水果架呢？瑞士雞髀都好大隻，見到都有成個發泡膠盒嘅長度，而且有特登分開啲薯條。雞髀咁大，但係都整得好滑，我覺得浸熟多dd會好啲，近骨嘅位置好似爭少少，九成半熟咁上下。經過長途跋涉咁樣返到屋企，嗰啲薯條就當然係淋晒，不過呢個非戰之罪，我用air Fryer整返熱，都ok。我自己係比較鍾意食呢種大條嘅薯條，有啲口感。扣分位就係嗰杯奶茶，真心好難飲，飲咗兩啖放棄咗。茶味好寡，比較單薄，唔香唔濃，味道亦都唔平衡。題外話，其實香港做茶餐廳，水吧真係好緊要。好似平時去食早餐，好少話腸仔蛋沙嗲牛肉麵整得太難食，但係奶茶咖啡就真係可以有好大嘅差距，好飲嘅咖啡茶絕對係吸引客人回頭嘅因素。