百芳池上便當 (大河道) (已搬遷) 新店位置

當佢連餐牌個樣都麻麻，其實真係減低咗衝動。台式便當，台灣食都唔係間間好樣，記憶好深係傳統便當用紙盒裝睇唔到樣，豬扒便當用膠盒裝睇到樣，明明內容一樣，最多膠盒大少少，但見得人同唔見得人，價錢差幾十蚊（新台幣）。價錢以晚市計可接受，一直想等佢出特價餐先試，但佢堅持到，炸物嘅香味一次又一次濃烈，相信都係主因。圖片只供參考真係參考，告訴你只有更差，沒有如果。即叫即炸嘅便當，滿心歡喜聞住香味返去開箱，天堂同地獄永遠係共存。百芳豬扒便當，深色到奇績唔燶嘅炸豬扒，告訴我返炸過幾次，豬肉無豬味係必然，炸多幾次就做到肉乾，半隻鹵蛋唔入味，少量雜菜算常有配塔，醃菜得一款較重味，粟米同粉絲屬少見，粟米口感唔錯，粉絲辣辣地幾過癮，總份量都多。香酥炸雞腿便當，配菜同份量都一樣，炸雞腿另裝，體型叫唔錯，但皮脆硬厚，肉還算可以，但唔多。夜市花枝丸，做優惠買滿一百加十蚊？應該差唔多，炸得最出色，所謂嘅老蛋，成粒皺晒，好多年無食，台灣夜市就一定未見過。餐飲三選一，阿薩姆紅茶同碳焙烏龍都無糖，雖然叫熱飲無稀釋會比較濃，但佢明顯係茶葉浸太耐。如果你想感受或回味台灣風味，依間絕對會影響你印象。