南洋家

營業中

休息中

行完維園年宵經過間門面好有特色嘅熟食外賣店，雖然鋪頭唔大，但嘢食種類多元化，外賣店主打南洋菜式，泰國、印尼、星洲特色菜式糕點都有，見啲小菜同糕點都唔貴買咗啲返屋企試。題外話，職員哥哥仔好有禮貌同細心咁幫兩位問路嘅老人家，仲寫埋紙仔教佢哋點行，抵讚👍🏻廚窗啲糕點好吸引有好多款前菜主食都係100蚊3盒，我揀咗邊泰式酸辣鳳爪、泰式燒豬頸肉、泰式八爪魚。泰式鳳爪味道適中，泰式鳳爪最怕係過酸或者過辣，呢個就啱啱好，酸甜辣味都無過搶。泰式豬頸肉係烤熟嘅所以唔油，入口有淡淡香茅味，味道正常。第一次食泰式八爪魚，味道好有驚喜，醬汁酸酸辣辣有豐富嘅香草味，完全唔腥，比日式八爪魚好食。綠色黃金糕係班蘭味，味道清香；黃色係香茅味，第一次食香茅味嘅黃金糕味道好清新好有驚喜，兩隻味我都好中意，下年新年可以訂啲嚟做年糕。綠色係班蘭味千層糕，質感軟糯食落唔癡牙，有斑蘭同椰汁味；黑色係芝麻味，咬果陣有原粒芝麻爆開嘅感覺，有芝麻味，兩者都唔會太甜，但相比之下我比較喜歡班蘭味。班蘭蛋糕好鬆軟，好似海綿咁壓扁佢會自動復位好好玩，食落好香班蘭味，配咖啡或茶嚟做早餐或下午茶都好正。