霸嗎拉麵 (已結業)

香港地的日本拉麵店開到成行成市，間間都話有特色，其實湯底以外，叉燒質素都好重要。今日去寶琳探個friend，行出地鐵站口竟然見到開咗「霸嗎拉麵」，喺第二間食過，最鍾意佢湯底夠濃，日本叉燒真係夠肥瘦相間唔 “柴皮”，就算多人排隊都要食呀。我呢啲食肉獸梗係先嚟碗有4大件日本叉燒的特盛炙燒豚肉拉麵先啦，嘩!不得了呀，質素同喺日本食時一樣，湯底濃稠程度係掛麵架，每條麵都沾到豬骨濃湯，好好味;至於靈魂叉燒呢? 正呀喂，每件都肥美嫩滑，唔係瘦到鞋恰恰架，莫講話喺香港，其實喺日本都好難得食到咁肥美嫩滑的日本叉燒，口味正宗。天氣熱到溶咁滯，我再叫咗一客枝豆及蘋果汽水降下温先。枝豆粒粒碩大豐滿，翠綠新鮮，灑上調味鹽，食到停唔到口呀。蘋果汽水冰涼上桌，味道清甜果味真實，原來選用信州蘋果汁，比例更高達50%，難怪天然好味。店內裝修設計都好日式，價錢又公道，嚟開寶琳就咪錯過嘞，如此質素，出現人龍都好正常……食好(東)西係要等下啦。