洪記潮州滷味 (已結業)

轉咗新工開始忙咗，好多時候都貪方便外賣返屋企，最近又買咗土瓜灣嘅洪記潮州滷味，作為晚餐非常值得推介。我叫咗鵝片豬脷飯，另外加咗一件健康豆腐、蒜蓉炒白菜，隨餐仲附送老火湯。老火湯用咗瘦肉煲，仲有蘿蔔同冬瓜。蒜蓉炒菜心好好食，蒜味好濃，菜又爽口，好啱撈飯食。健康豆腐即叫即整，啲皮炸到金黃色，好吸引。豆腐好香口，有啲椒鹽，每啖都品嚐到濃郁嘅豆香。鵝片豬脷飯加咗榨菜同鹵水豆腐做配菜，榨菜惹味又開胃。鵝片夠入味，鵝肉味重，仲可以點附送嘅米醋一齊食。而豬脷就夠稔身，整體水準好高。雙拼飯份量好多，食唔曬留返第二日再食，而且整返熱都仲保持到水準，非常抵玩。