新華苑酒家

營業中

休息中

一雞死、一雞鳴，之前間味道態度冇兩道嘅樓上酒樓摺咗之後，好快就到呢間新店上場，仲要係地舖，方便埋坐輪椅人士。下午1點去等位，新嘢就梗係人山人海，喺門口等咗10分鐘就入得反而算快。雖然新開，但落單上菜冇甩碌，部長醒目，主動問實點心紙係咪前一後都有寫嘢。目測全場七十張4人枱左右。你話係咪好食到齒頰留香，我個人認為冇幾多間食肆稱得上。但呢間叫做冇一啲離譜嘅味道，譬如揚州窩麵幼麵底，幾足料，計有：豬膶、雞柳、蝦肉、菜芯、冬菇、豬頸肉，家庭式乜都有啲嘅味道。平平哋個廿八蚊鹹蛋叉燒飯，又俾到半肥瘦叉燒嚟。口水雞同第度啲味有啲出入，呢碟好重花椒，冇乜辣反而麻，痺痺哋又另一種食法，部位俾咗雞胸雞背雞翼。櫃枱埋單夠爽手，問及付款方式係「微信支付寶現金visa……」如數家珍。如廁請到商場就近。