牛魔 (已結業)

上次食完牛魔之後一直都念念不忘。於是我同女朋友就襯假日去再食。牛魔開12點，但未夠鐘已經有三、五位顧客喺出面排隊等緊喇。原來打算好似上次嚟食咁點燒肉，入座睇到餐牌，原來午市有lunch set，價錢都好抵，所以轉咗目標，點咗兩個lunch set。安格斯特選牛肉眼丼飯餐 - 牛魔將安格斯肉眼扒燒好後切片，再鋪上飯上面。肉眼片邊脆肉嫩，牛味香濃，非常之誘人。慢煮牛肋骨餐 - 我平時食牛肋骨飯通常都係喺啲韓式餐廳，喺日式燒肉店食都係第一次。牛魔嘅慢煮牛肋骨絕對唔會比韓式餐廳差。汁醬配埋白飯嚟食，令你食慾大增。依兩個套餐都配上特選餐湯，沙律同三款前菜。真係無得彈。