霸嗎拉麵 (已結業)

第一次食依間分店時好地地，保持到出面舖頭嘅水準。但今次隔左三個月再嚟，就完全唔掂，好似吳克儉一樣唔得掂。事情是咁的。話說和女友二人晚餐，番工又受氣，想食番餐好者，諗住食霸嗎穩陣，點知，當食店長駐將軍澳，事情就不一樣了！當我入到去，店員好似好唔想理我哋咁，高談闊論，興致高昂咁傾偈。我叫左個檸檬豚肉拉麵，仲加左粒味玉。點知嚟嗰陣少左隻蛋，我同個員工講，個員工乜都冇講就行開咗，連「唔好意思，先生，等我幫你check吓先」都冇講。我心諗，你哋傾偈咁開心咁大聲，同客講嘢就講一個字都懶，有啲奇怪。之後啲麵嚟咗，嘩，啲拉麵真係我食過嘅拉麵之中最——————————淋的。濕到好似濕毛巾，質地好似上海菜啲煨麵咁，軟淋淋，真有一刻忘記咗自己食緊拉麵。係個個moment，員工嘅笑聲蓋過咗女友講嘢嘅聲音，真係第一次見到員工笑得仲大聲過啲顧客。佢哋興高采烈，我就一面好似樹熊食樹葉，好無奈。其實我真係好失望。係銅鑼灣間霸嗎我好鐘意食，嚟到將軍澳本來好開心，點知咁快就變質？莫非身住將軍澳，就唔配有好嘅待遇，食到好嘅食物？我唔知，我只知道，嗰刻我感受到深深嘅寂寞。